Дар ин бахш хабарҳои кӯтоҳ дар бораи рӯйдодҳо, ҳодисаҳо, изҳорот, дастовардҳо, арзёбиҳо, раддабандиҳо, пешгӯиҳо дар соҳаи роҳу нақлиёти кишвар, минтақа ва ҷаҳон ҷойгир карда мешаванд.
ДАР ТОҶИКИСТОН
Президенти Тоҷикистон Муҳтарам Эмомалӣ Раҳмон дастур доданд, ки ба зарардидагони офати табиӣ дар шаҳри Кӯлоб тамоми кӯмакҳои зарурӣ расонида шавад. Шаби 1-уми майи соли 2026 бар асари бориши шадид дар баъзе аз маҳаллаҳои шаҳри Кӯлоб ҳодисаи нохуши табиӣ- сел ба амал омад. Дар натиҷаи офати табиӣ ба манзилҳои истиқоматии шаҳвандон, иншооти ёрирасон ва ба қисме аз инфрасохтори шаҳр зарар расид.
Дар асоси дастуру супориши Президенти Ҷумҳурии Тоҷикистон муҳтарам Эмомалӣ Раҳмон соати 3-и шаби 2 юми май таҳти роҳбарии Раиси вилояти Хатлон Давлаталӣ Саид ҷаласаи ситоди фаврии вилоятӣ бо иштироки роҳбарону намояндагони сохторҳои марбута баргузор гардид. Таъкид карда шуд, ки ҷиҳати ҳарчи зудтар бартараф намудани оқибатҳои офати табиӣ тамоми тадбирҳои зарурӣ андешида шуда, техникаву механизмҳои зарурӣ пурра сафарбар карда шаванд. Ба масъулон супориш дода шуд, ки корҳои барқарорсозӣ ва расонидани кумак ба аҳолии зарардида дар муҳлатҳои кутоҳ анҷом дода шавад.
Тибқи дастуру супоришҳои Сарвари давлат Раиси вилояти Хатлон Давлаталӣ Саид шабона ба маҳаллаҳо ва мавзеъҳои зарардида рафта, аз вазъи воқеии минтақаҳои осебдида, аз наздик шинос шуда, ҳамзамон бо сокинон суҳбат кард.
Дар натиҷа сели шаби 1 май ба хонаҳои истиқоматӣ, инчунин як қатор иншооти иҷтимоӣ ва шаҳрӣ зарар расонд. Мутаассифона, се нафар қурбони ҳодисаи табиӣ шуданд, ду нафари дигар бо ҷароҳатҳои гуногун дар беморхона бистарӣ гардиданд.
Мақомоти маҳаллӣ аллакай ҷаласаи фаврӣ доир карданд – сохторҳои масъул муваззаф гардиданд, ки дар муддати кӯтоҳтарин корҳои наҷотдиҳӣ, барқарорсозии инфрасохторро анҷом диҳанд ва ба зарардидагон кӯмак расонанд.
Президенти Ҷумҳурии Тоҷикистон, Пешвои миллат, уҳтарам Эмомалӣ Раҳмон ба оилаҳои қурбониёни обхезии Кӯлоб изҳори ҳамдардӣ карданд. Сарвари давлат дастур додаанд, ки ба зарардидагони офатҳои табиӣ тамоми кӯмаки зарурӣ расонида шавад ва мақомоту идораҳои дахлдор фавран ба рафъи оқибатҳои офатҳои табиӣ шурӯъ намоянд, хабар медиҳад Хадамоти матбуоти Президенти ҶТ.
Бо супориши Сарвари давлат Сарвазири ҷумҳурӣ Кохир Расулзода фавран ба минтақа рафт. Вай ба идораҳои дахлдор супориш дод, ки ба ҳамаи зарардидагон ёрии саривақтӣ расонанд, инчунин тамоми техника ва механизмҳои заруриро барои тоза кардани роҳҳо ва таъмири инфрасохтори вайроншуда истифода баранд.
***
Тоҷикистон ва Узбекистон соддагардонии расмиёти гумрукиро дар гузаргоҳҳои сарҳадии «Ҷартеппа» ва «Саразм» баррасӣ карданд. Дар гузаргоҳи сарҳадии «Ҷартеппа» - и Узбекистон, ки дар рӯбарӯи гузаргоҳи сарҳадии «Саразм» - и Тоҷикистон, дар марзи ноҳияи Ургути вилояти Самарқанд ва дар ҳамсоягӣ бо ҷамоати Саразми шаҳри Панҷакент ҷойгир аст, мулоқоти дуҷониба бо иштироки ҳайатҳои мақомоти гумруки Ҷумҳурии Тоҷикистон ва Ҷумҳурии Узбекистон баргузор гардид. Дар ин бора Хадамоти гумруки назди Ҳукумати Ҷумҳурии Тоҷикистон хабар медиҳад.
Масъалаҳои соддагардонии минбаъдаи интиқоли молу маҳсулот ва воситаҳои нақлиёт тавассути сарҳади гумрукӣ, такмили фаъолияти нуқтаҳои гузариш ва таҳкими ҳамкории байнисоҳавӣ баррасӣ карда шуданд.
Ҳамчунин дар ҷараёни мулоқот ҷонибҳо дар самти рақамисозии фаъолияти гумрукӣ табодули таҷриба карданд. Аз ҷумла, ҳайати Тоҷикистон низоми муайян ва ба расмият даровардани воситаҳои нақлиётро — VIN.TJ-ро пешниҳод намуд, ки аз 16 марти соли 2026 ба истифода дода шудааст.
Намояндагони ҷониби Узбекистон таҷрибаи пешқадами Тоҷикистонро дар ин самт баланд арзебӣ намуда, омодагии худро барои густариши ҳамкорӣ баён намуданд.
***
Дар Душанбе насби ҷароғакҳои муосири «ҳушманд» оғоз ёфт. Тавре АМИТ «Ховар» 23 апрел бо истинод ба Раёсати Вазорати корҳои дохилӣ дар шаҳри Душанбе иттилоъ дод, ҳамаи чароғакҳои роҳнамо дар кӯчаҳо ва хиёбонҳои пойтахт пурра нав ва бо дастгоҳҳои муосири «ҳушманд» иваз карда мешаванд.
Ташаббус дар доираи супоришҳои Раиси шаҳри Душанбе, муҳтарам Рустами Эмомалӣ оид ба мутобиқ гардонидани инфрасохтори роҳу нақлиёт ба меъёрҳои байналмилалӣ ва баланд бардоштани сатҳи бехатарии ҳаракат дар роҳ амалӣ карда мешавад.
Насби чароғакҳои муосир ба беҳтар кардани системаи идоракунии ҳаракати нақлиёт равона карда шудааст ва аз ҷониби РВКД дар шаҳри Душанбе дар ҳамкорӣ бо Корхонаи воҳиди давлатии «Шаҳри ҳушманд» (Smart City) амалӣ карда мешавад.
***
Тоҷикистон ва Олмон Протоколи соддагардонии расмиёти савдоро имзо карданд. Протокол дар бораи ворид намудани тағйирот ба Созишнома оид ба татбиқи лоиҳаи соддагардонии расмиёти савдо дар Осиёи Марказӣ бо тамдиди мӯҳлати татбиқи он то соли 2029 рӯзи 27 апрел аз ҷониби Вазири рушди иқтисод ва савдои Тоҷикистон Абдураҳмон Абдураҳмонзода ва директори ҷамъияти Олмон оид ба ҳамкории байналмилалӣ дар Ҷумҳурии Тоҷикистон Виктор Ветсел имзо шуд. Дар ин бора 28 апрел АМИТ «Ховар» иттилоъ дод.
Тибқи маълумоти Вазорати рушди иқтисод ва савдои ҶТ, лоиҳаи соддагардонии расмиёти тиҷоратӣ панҷ кишвари Осиёи Марказиро фаро мегирад ва иловатан аз ҷониби Вазорати едералии ҳамкории иқтисодӣ ва рушди Олмон, инчунин тавассути механизмҳои Иттиҳоди Аврупо дар ҳаҷми 5,2 миллион евро маблағгузорӣ карда мешавад.
Лоиҳа ба тақвияти тадбирҳо дар соҳаи содда кардани расмиёти савдо, инчунин ҷустуҷӯи ҳалли афзоиши иқтидори ширкатҳои нақлиётӣ ва логистикӣ дар хатсайрҳои долонҳои мултимодалӣ равона шудааст.
ДАР МИНТАҚА
Осиёи Марказӣ нақлиёти ҷамъиятиро торафт бештар нав месозад ва истеҳсолкунандагони чинӣ дар ин раванд ҷойгоҳи калидиро ишғол кардаанд. Яке аз бозигарони асосии ин бозор Yutong мебошад, ки солҳои охир ба минтақа ҳазорҳо автобус интиқол додааст ва ҳоло дар ин ҷо на танҳо техника, балки тамоми модели таҷдидшудаи нақлиётро мефурӯшад: бо мутобиқ шудан ба шароити маҳаллӣ, хизматрасонӣ, мониторинги рақамӣ ва хати васеи мошинҳо аз дизелӣ то водород.
Ин дар корхонаи Ютонг дар Чжэнчжоуи Чин, ки моҳи апрел рӯзноманигорон, интиқолдиҳандагон, дилерҳо ва мансабдорони кишварҳои Осиёи Марказиро даъват карда буд, хуб дида мешуд.
Ютонг на танҳо як корхонаи калон аст. Он истеҳсолкунандаест, ки аллакай воқеияти бозорро ташаккул додааст. Соли 2025 ширкат 49518 адад автобус фурӯхт. Ҳиссаи бозори ҷаҳонӣ 11,6% - ро ташкил дод ва дар дохили Чин ширкат тақрибан 36% бозори миллиро дар тӯли чанд сол назорат мекунад.
Ҳаҷми содироти умумӣ ҳудуди 230 ҳазор ададро убур кард. Аз ин миқдор зиёда аз 210 ҳазор адад автобуси мусофиркашони фурӯхташударо электромобилҳо ва мошинҳои дорои технологияҳои гибридӣ ташкил медиҳанд.
***
Зиёда аз 1577 км роҳи оҳан дар соли 2026 дар Қазоқистон нав карда мешавад. Дар кишвар татбиқи барномаи васеи таҷдиди инфрасохтори роҳи оҳан бо маром ҷараён мегирад, хабар медиҳад Rail-news.kz.
Дар шоҳроҳ аз субҳи барвақт то бегоҳ бригадаҳои роҳсозон, техникҳо ва мутахассисон кор мекунанд, ки барои онҳо ҳар як метри роҳ – масъулият ҷиҳати бехатарии ҳаракат аст.
Дар давоми соли 2026 бояд зиёда аз 1 577 километр роҳи оҳан навсозӣ карда шавад, аз ҷумла дар 573 километр таъмири асосӣ гузаронида мешавад. Ин яке аз марҳилаҳои калонтарини навсозии инфрасохтори солҳои охир аст, ки ба баланд бардоштани эътимоднокӣ ва устувории раванди ҳамлу нақл равона шудааст.
***
Ҳаҷми транзит дар Қазоқистон дар соли 2026 ба 55 миллион тонна мерасад. Дар ин бора Вазири нақлиёти ҶҚ Нурлан Сауранбаев дар ҷаласа оид ба рушди иқтидори транзитӣ-нақлиётӣ хвбар дод, иттилоъ додааст 14 апрел АБИ «Kazinform».
Вазир зарурати андешидани тадбирҳои фаврӣ ва ҳамоҳангшударо барои ноил гардидан ба нишондиҳандаҳои мақсадноки афзоиши ҳаҷми транзитӣ то 55 миллион тонна таъкид кард. Мувофиқи вазифаҳои гузошташуда, супориш дода шудааст, ки корҳо оид ба рушди гузаргоҳҳои калидии транзитӣ, навсозии инфрасохтори нақлиётӣ ва дастгирии лоиҳаҳое, ки барои таҳкими нақши Қазоқистон ҳамчун маркази пешрафтаи транзитии Авруосиё аҳамияти стратегӣ доранд, фаъол карда шаванд.
Қаблан дар ҷаласаи таҳти раёсати Сарвазир Олжас Бектенов бо мақсади ошкор кардани иқтидор зарурати васеъ кардани қобилияти интиқоли нуқтаҳои байнидавлатии пайвастшавӣ то 100 миллион тонна дар як сол таъкид карда шуда буд. Ин ба ҳамлу нақли байналмилалӣ такон мебахшад ва тартиби гузариш аз гузаргоҳҳоро осон мекунад.
ДАР ҶАҲОН
Тамбашавӣ бекор карда мешавад: дар Пекин таксиҳои «бизнес-класс»-ро, ки парвоз мекунанд, ба намоиш гузоштанд. Ширкати чинии GAC дар Пекин таксии барқии парвозкунандаи Govy AirCab-ро, ки аз рӯи схемаи мултикоптер бо чор винт сохта ва барои интиқоли мусофирон дар шаҳр пешбинӣ шудааст, муаррифӣ кард. Дар ин бора tarantas.news хабар медиҳад.
Навгоние, ки то ҳол ҳамчун консепсия вуҷуд дорад, қодир аст аз 20 то 30 километрро бидуни барқ тай кунад ва барқпуркунии зуд тақрибан 25 дақиқаро дарбармегирад. Идоракунӣ ва даъват тавассути барномаи мобилии дар экосистемаи рақамӣ насбшуда амалӣ карда мешавад.
Салони дуҷоя аз курсиҳои ҷудогона ва бароҳат, ороиши сабук, дастпӯшакҳо ва панели дорои экран иборат аст.
Лоиҳа барои хатсайрҳои кӯтоҳ — интиқол ва сафарҳои сайёҳӣ пешбинӣ шудааст. Системаи Intelligence як блоки ҳисобкуниро бо истеҳсоли то 500 TOPS барои ошкор кардани монеаҳо ва навигатсияи бехатар дар бар мегирад.
